ముఖానికి చిరునవ్వే అసలైన అందం! ఆ అరనవ్వులో.. ఎన్నెన్నో భావాలు. ఎంతో సోయగం. ఆ క్షణంలో ఆనందం తాండవిస్తుంది. ఆత్మవిశ్వాసం తొణికిసలాడుతుంది. చక్కటి పలువరస పలకరిస్తుంది. అన్నీకలిసి... ప్రకృతిలోని కళాత్మక సౌందర్యం తళుక్కున మెరుస్తుంది.
అందుకే చిరునవ్వుకూ, ఆత్మవిశ్వాసానికీ, పలువరుసకూ, అందానికీ.. అంతటి విడదీయరాని బంధం!
ఎగుడుదిగుడు పళ్లు.. రంగుమారిపోయిన దంతాలు.. విరిగిపోయిన ముందుపళ్లు.. మరీ ముందుకు తోసుకొచ్చే ఎత్తుపళ్లు.. పళ్ల మధ్య పెద్దపెద్ద సందులు.. అసహజంగా తయారైన చిగుళ్లు... ఇవి కేవలం నోటి ఆరోగ్యాన్నే కాదు.. మొత్తం మనిషి అందాన్నే మార్చేస్తాయి. మనసులో న్యూనత పేరుకుపోయేలా చేసి ఆత్మవిశ్వాసాన్నీ దెబ్బతీస్తాయి. అయితే ఇవేవీ సరిచెయ్యలేనివి కాదు. అందుకే... ఆధునిక దంత వైద్యంలో 'సౌందర్య' విభాగానికి అంతటి ప్రాముఖ్యం పెరిగింది. వీటన్నింటినీ సరిచేసేందుకు ఇప్పుడు ఎన్నో అత్యాధునికమైన విధానాలు అందుబాటులోకి వచ్చాయి. ఏకంగా చిరునవ్వునే కళాత్మకంగా తీర్చిదిద్దే 'స్మైల్‌ డిజైన్‌' ప్రక్రియలూ వూపందుకున్నాయి.
రంగు మారితే?
పళ్లు విరిగితే?
ప్రమాదాల్లోనో, కింద పడినప్పుడో తరచుగా ఎంతోమందికి ముందు పళ్లు విరుగుతుంటాయి. కొన్నిసార్లు ఇవి సగానికన్నా పైగా కూడా విరగొచ్చు. అలాంటి సమయాల్లో రక్తస్రావం జరగకుండా ఉండి, దంతమూలం, రక్తనాళాలు దెబ్బతినకుండా బాగున్నట్టయితే.. విరిగిన పన్ను వరకు 'కాంపోజిట్‌ ఫిల్లింగ్‌' చేస్తారు. ఇవి కొన్ని సంవత్సరాల వరకు ఎలాంటి ఇబ్బంది లేకుండా ఉంటే ఫర్వాలేదు. లేకపోతే ఆ పళ్ల మీద 'సిరామిక్‌ లామినేట్‌' చేయాల్సి ఉంటుంది. ఇందులో అసలు పన్ను ఆకారంలోనే 2 మి.మీ. మందం గల సిరమిక్‌ పొరను తయారు చేసి పంటి మీద అతికిస్తారు. ఇవేగాకుండా అవసరమైతే పన్ను పైన 'సిరామిక్‌ క్రౌన్' కూడా బిగిస్తారు.
ఫ్లోరోసిస్‌ దుష్ప్రభావానికి?
తాగునీటిలో ఫ్లోరైడ్‌ అధికంగా ఉన్న ప్రాంతాల్లో ఫ్లోరోసిస్‌ కారణంగా పళ్లు రంగు మారిపోయి.. అవి చూడ్డానికి వికారంగా తయారవుతాయి. పళ్లు కొద్దిగానే పసుపు రంగులోకి మారితే బ్లీచింగ్‌ వంటివి ప్రయత్నిస్తారు. ముందు రెండు పళ్లు రంగు మారితే.. వీటి మీద కాంపోజిట్‌ ఫిల్లింగ్‌ చేస్తారు. ఈ ప్రక్రియలో రంగు మారిన పొరలను తొలగించి, పళ్ల రంగులోనే ఉన్న పదార్థాన్ని అతికిస్తారు. దాని మీద అతి నీలలోహిత కిరణాలను ప్రసరింప జేయటం ద్వారా అది గట్టిగా అవుతుంది. ఇది పది పదిహేను నిమిషాల్లోనే ముగుస్తుంది. కాంపోజిట్‌ ఫిల్లింగ్‌ చేసిన పళ్లు సహజమైన దంతాల మాదిరిగానే ఉంటాయి. కొద్దికాలం తర్వాత ఇవి ఎప్పుడైనా రంగు మారితే పాలిష్‌ చేస్తారు. ఫిల్లింగ్‌ ఊడిపోయినా తిరిగి అతికించుకోవచ్చు.
కొందరికి దెబ్బ తగలటం వల్ల కూడా పళ్లు నల్లగా అవుతుంటాయి. వీరికి లామినేట్స్‌గానీ, క్రౌన్స్‌ గానీ బాగా ఉపయోగపడతాయి. పన్ను సైజు అన్నివైపులా తగ్గించి అదే ఆకారంలో సిరమిక్‌తో చేసిన క్రౌన్‌ని బిగిస్తారు.
పళ్ల సందులు
పళ్లు, చిగుళ్ల ఆకారంలో తేడా ఉంటే పళ్లసందులు ఏర్పడుతుంటాయి. కొందరిలో పై రెండు మధ్యపళ్ల నడుమ పెదవి కణజాలం (ఫ్రేనలమ్‌) అతుక్కుపోయి ఉంటుంది. దీనిని మిడ్‌లైన్‌ డయాస్టెమా అంటారు. దీంతో చిగుళ్ల మధ్య ఖాళీ ఏర్పడి పళ్ల సందులు ఏర్పడతాయి. ఇలాంటి వారికి 'కాంపోజిట్‌ ఫిల్లింగ్‌'తో ఖాళీలను సరిచేయొచ్చు. అవసరమైతే చిగురును కత్తిరించి తర్వాత లామినేట్‌ చేస్తారు. ఇందులో పన్నుని కత్తిరించి ముందుకు కనిపించే భాగాన్ని లామినేట్‌ చేయటం ద్వారా పన్ను ఆకారాన్ని కొద్దిగా పెంచుతారు. తప్పనిసరి పరిస్థితుల్లో క్రౌన్ కూడా బిగించొచ్చు.
ప్రక్రియలు అందంతో పాటు నోటి ఆరోగ్యాన్నీ కాపడతాయి. ముందుపళ్లు అందంగా తీర్చిదిద్దటం, ఎత్తుపళ్లు సరిచేయటం వంటివీ తరచుగా అవసరమయ్యేవే.
స్మైల్‌ డిజైనింగ్‌
చిరునవ్వును.. అందంగా తీర్చిదిద్దేందుకు అవసరమైన చికిత్సలన్నీ దీని కిందకు వస్తాయి. కొందరికి చిగుళ్లపై వరకూ ఉండటం వల్ల దంతాలు చిన్నగా కనిపిస్తాయి. మరికొందరిలో చిగుళ్లు ఒకేరకంగా కాకుండా ఎగుడు దిగుడుగానూ ఉంటాయి. దీంతో నవ్వినపుడు అంత అందంగా కనిపించరు. చిగుళ్ల పరిమాణాన్ని తగ్గించటం ద్వారా దీనిని సరిచేయొచ్చు. ఆపరేషన్‌ చేసి కొంత చిగురు భాగాన్ని తొలగిస్తారు. దీంతో పళ్లు పొడవుగా కనిపించి, నవ్వినపుడు అందాన్ని తెచ్చిపెడతాయి. ఇది చిగురు ఉబ్బెత్తుగా, ఎక్కువగా ఉన్న ఒక పన్నుకి గానీ బయటకు కనిపించే అన్ని పళ్లకు గానీ చేస్తారు. అవసరాన్ని బట్టి అందం ఇనుమడించేలా పళ్ల ఆకృతినీ సరిచేస్తారు.
వజ్రాల మెరుపు
ఇటీవల కొందరు ఫ్యాషన్‌ కోసం పళ్ల మీద డైమండ్స్‌, రంగు రాళ్లు, కలర్‌ చిప్స్‌ పొదిగించుకుంటున్నారు. రంధ్రం చేయకుండా వీటిని పన్ను మీదనే అమరుస్తారు. పన్నుకు రంధ్రం చేసి అందులో డైమండ్స్‌ను అమరిస్తే దానిని తొలగించినపుడు పన్ను దెబ్బతింటుంది. అందుకే వెనకవైపు నున్నగా ఉండే డైమండ్స్‌ని అతికించటం ద్వారా ఆ ఇబ్బందేమీ ఉండదు. రంగురాళ్లు, చిప్స్‌ని కూడా ఇదే పద్ధతిలో అమరుస్తారు.
ఎత్తుపళ్లు
ఎత్తుపళ్లు ఉన్నవారికి బ్రేసెస్‌తో సరిచేస్తారు. ముందుగా దంతాల నమూనా తీసుకొని, పళ్లు తొలగించకుండా సరిచేసే అవకాశాన్ని పరిశీలిస్తారు. ఎందుకంటే కొన్నిసార్లు పళ్లు తొలగించాల్సిన అవసరముంటుంది. బ్రేసెస్‌ను పళ్ల మీద అమర్చి, వాటి మధ్య నుంచి సన్నటి తీగను తొడుగుతారు. దానిని బిగించటం ద్వారా పళ్ల మీద ఒత్తిడి పెరిగేలా చేస్తారు. దీంతో క్రమంగా అవి లోపలి వైపు నెట్టుకొని వెళ్తాయి. మూడు వారాలకు ఒకసారి తీగను తిరిగి గట్టిగా బిగించాల్సి ఉంటుంది. వీటి ద్వారా సాధారణంగా 6-8 నెలల్లో ఎత్తుపళ్లు సరి చేసుకోవచ్చు. ఎత్తుపళ్లు ఉన్నవారు చిన్నతనంలోనే బ్రేసెస్‌ వాడటం మంచిది. వీటిల్లో అవసరమైనప్పుడు తీయటానికి వీలైనవి (రిమూవబుల్‌), ఎప్పుడూ లోపలే ఉండేవి (ఫిక్స్‌డ్‌) అందుబాటులో ఉన్నాయి. ప్రస్తుతం పారదర్శకంగా ఉండే సిరమిక్‌ బ్రేసెస్‌ను ఎక్కువగా వాడుతున్నారు. ఇవి మెటల్‌ బ్రేసెస్‌లా పైకి ఎబ్బెట్టుగా కనిపించవు.
ఇంప్లాంట్‌
పళ్లు విరిగినప్పుడు కొందరికి దంత మూలం కూడా దెబ్బతింటుంది. అప్పుడు ఆ మూలాన్ని పూర్తిగా తీసేసి దవడ ఎముకలో టైటానియంతో చేసిన ఇంప్లాంట్‌ బిగిస్తారు. దాని మీద క్రౌన్‌ని (కృత్రిమ పన్ను) అమరుస్తారు. దీంతో ఖాళీలు పూర్తిగా తొలగిపోయి, మిగతా పళ్లు దెబ్బతినకుండా ఉంటాయి. ఇంప్లాంట్‌ దవడ ఎముకలో ఇమిడిపోయి కదలకుండా గట్టిగా ఉంటుంది. బ్రిడ్జెస్‌, కట్టుడుపళ్లతో ఎదురయ్యే ఇబ్బందులేమీ దీనిలో ఉండవు. ఒకటి, అంతకన్నా ఎక్కువ పళ్లు విరిగినవారికి.. ఎముక బలంగా ఉన్నవారికి ఇది ఉత్తమమైన పద్ధతి.
* ముందు పళ్లు దెబ్బతిన్నప్పుడు దవడ ఎముక బలంగా ఉన్నట్టయితే.. ఇంప్లాంట్‌ బిగించి, అదే రోజు లేదంటే మరునాడు క్రౌన్ కూడా అమరుస్తారు. దీన్నే 'ఇమ్మిడియేట్‌ లోడింగ్‌' అంటారు.
- డా|| కడియాల రాజేంద్ర - డెంటల్‌ సర్జన్‌
- ==================================
శ్రీ శేషగిరిరావుగారూ,
ReplyDeleteవైద్యం గురించి ఇలాంటి బ్లాగు ఒకటి ఉందని ఇప్పటివరకు తెలియదు. దంతాల సమస్య వచ్చి క్రౌన్ వెయ్యాలని చెప్పారు డాక్టర్ అందులో స్టీలు, సెరామిక్ రెండురకాలు ఉన్నాయని ఏదైనా వేసుకోవచ్చని చెప్పారు. ఏది మంచిదో ఎన్నాళ్ళు ఉంటుందో తెలుసుకోవాలని నెట్ లో వెతికితే ఇలా ఈ బ్లాగు దొరికింది. చాలా ఉపయోగకరమైన సమాచారం ఇచ్చారు. ఇంకా చాలా పోస్టులు ఉన్నట్టున్నాయి., అన్నీ చదివి తెలుసుకుంటాం. ఎవరైనా డాక్టర్లు తెలుగులో బ్లాగులు రాస్తే బాగుండును సందేహాలు కూడా అందులోనే తీర్చుకోవచ్చు అనుకునేదాన్ని. మీరు ఆ పని చేస్తున్నందుకు ధన్యవాదాలు.
శ్రీ ముద్దు రమణారావుగారు ప్రముఖ నేత్రవైద్యులు శ్రీకాకుళం లో మీకు తెలిసే ఉంటారు. మాకు దగ్గరి బంధువు. ఆయన కమనీయం (www.kamaneeyam.blogspot.com) అనే బ్లాగు నిర్వహిస్తున్నారు. అయితే ఆయనది సాహిత్యానికి సంబంధించిన బ్లాగు.