మడమ నొప్పి,Heel pain

• 
  
• 
• 
  

• ఆరోగ్యమే మహాభాగ్యము.మనిషికి ఏమిటి ఉన్నా , ఎన్ని ఉన్నా ఆరోగ్యముగా లేకపోతే ఎందుకు పనికిరాడు . ఆరోగ్యము గా ఉంటే అడివిలోనైనా బ్రతికేయగలడు . మనిషికే కాదు ప్రపంచములో ప్రతిజీవికి ఇదే సూత్రము జీవన మనుగడలో ముఖ్యమైనది . మన ఆరోగ్యాన్ని కాపాడుకోవాలి . ఏ రోగాలు రాకుండా ముందు జాగ్రత్తలు తీసుకోవాలి . జబ్బు వచ్చిన వెంటనే తగిన చికిత్స తీసుకోవాలి . బ్రతికినన్నాళ్ళు హాయిగా ఆరోగ్యము గా బ్రతకాలన్నదే నిజమైన జీవన విధానము . ఇప్పుడు -మడమ నొప్పి,Heel pain- గురించి తెలుసుకొని మన ఆరోగ్యాన్ని కాపాడుకుందాం !. క్రింద నుదహరించిన చికిత్సావిధానాలు మనిషి అవగాహన కోసం వివరించిన ప్రధమ చికిత్స మాత్రమే మంచి చికిత్స కోసం తగిన వైద్య నిపుణులను సంప్రదించాలి ...

ప్రస్తుత కాలంలో మారిన జీవనశైలిని అలవర్చుకోలేక చాలామంది మడమ నొప్పితో బాధపడుతున్నారు. దీనికి కారణం సరైన పోషక ఆహారం తీసుకోకపోవడం, ఊబకాయం తోడై మడమ నొప్పిని అతి చిన్నవయస్సులోనే ఎదుర్కొంటున్నారు. నిత్య జీవితంలో ప్రతి కదలిక మడిమలోని కీలు సహాయంతో జరుగుతుంది. మడమ ఎముకలో మార్పు రావటం వలన మడమ నొప్పితో కదలికలు కష్టంగా మారతాయి. మడమ కింది భాగంలో ఉండే ఎముక (కాల్కేనియస్) పదునుగా పెరుగుతుంది. ఫలితంగా పాదం అడుగు భాగంలో నొప్పి కలుగుతుంది.
రాత్రంతా విశ్రాంతిగా పడుకున్న తర్వాత ఉదయం మంచం దిగుతూనే కాలు నేల మీద పెట్టాలంటే చాలామందికి నరకం కనిపిస్తుంటుంది. రోజులో ఎక్కువ సేపు నిలబడే ఉండటం, లేదా సాధారణంగా గట్టి నేల మీద నడక, పరుగు, జాగింగ్‌ వంటివి దీనికి ముఖ్య కారణం.

• కారణాలు :

మన పాదం అడుగున- మడమ నుంచి వేళ్ల వరకూ ఒక బలిష్టమైన కండరం ఉంటుంది. దీన్నే 'ప్లాంటార్‌ ఫేషియా' అంటారు. పాదం అడుగు వైపున.. ఒక పక్క గొయ్యిలా ఉండే భాగానికి (ఆర్చ్‌) కూడా ఈ దృఢమైన కండరమే ఆధారం. గట్టి నేల మీద బలంగా పరుగెత్తటం, ఎక్కువసేపు నిలబడే ఉండటం.. ఇలా ఏదైనా కారణాన ఈ కండరం మీద తీవ్రమైన ఒత్తిడి పడితే ఇది కొద్దిగా చిరగొచ్చు. లేదా బాగా నలిగినట్టుగా అవ్వచ్చు. ఫలితమే- నడిచేటప్పుడు మడమ నొప్పి. చెప్పుల్లేకుండా నడుస్తున్నా, మెట్లు ఎక్కుతున్నా ఈ నొప్పి ఇంకా పెరుగుతుంటుంది. సాధారణంగా ఈ నొప్పి పూర్తిగా తగ్గటానికి ఎంతలేదన్నా 8, 9 నెలలు పడుతుంది. కొంతమందికి ఇంకా ఎక్కువ సమయమే పట్టొచ్చు కూడా.

• నివారణ--

ఇటువంటి నొప్పులకు వ్యాయామం బాగా పని చేస్తుంది. పాదానికి సాధ్యమైనంత విశ్రాంతి ఇవ్వటం, నొప్పి బాధ తగ్గేందుకు మందులేసుకోవటం వంటివన్నీ కాక కొన్ని ప్రత్యేక వ్యాయామాలతో మంచి ప్రయోజనం ఉంటుంది. పాదం అడుగున ఉండే ఈ ప్లాంటార్‌ ఫేషియా కండరాన్ని నిదానంగా సాగదీసి వదులుతుండటం (స్ట్రెచ్‌) దీనిలోని వ్యాయామం.

• జాగ్రత్తలు

• మడమ నొప్పికి నాటు వైద్యం, పచ్చబొట్లు లాంటివి చేయకూడదు.
• నొప్పి తీవ్రత ఎక్కువగా ఉన్నప్పుడు పాదాలను వేడి నీళ్ళల్లో ఉంచి అడుగు భాగమును నెమ్మదిగా ప్రెస్ చేయాలి.
• కాలి పాదాన్ని కుడి నుండి ఎడమకు, ఎడమ నుండి కుడికి త్రిప్పుతూ నెమ్మదిగా వ్యాయామం చేయాలి.
• వ్యాయామాలు చేసేటప్పుడు ఫిజయోథెరిపీ వైద్యుల సలహాలు తీసుకోవాలి.
• నిప్పి ఉన్నప్పుడు అతిగా ‘పెయిన్ కిల్లర్స్’ వాడకుండా డాక్టర్ సలహా మేరకు మందులను వాడుకోవాలి.
• అధిక బరువు ఉన్నవారు బరువు తగ్గుటానికి ప్రయత్నించాలి.
• నొప్పి తీవ్రత ఎక్కువ ఉన్నప్పుడు బరువులు ఎత్తడం, పరిగెత్తడం, మెట్లు ఎక్కడం, దిగడం చేయకూడదు.
• వైద్యుల సలహామేరకు తీసిన ఎక్స్‌రే వలన ఈ మడిమ నొప్పి తీవ్రత తెలుస్తుంది.

• వ్యాయామాలు

1. మడమ నొప్పి ఉన్న కాలు పైకి వచ్చేలా.. కుర్చీలో కాలు మీద కాలు వేసుకుని కూర్చోవాలి. చేత్తో పాదాన్ని వేళ్ల దగ్గర పట్టుకుని... సాధ్యమైనంత వెనక్కి వంచాలి. ఇలా వెనక్కి సాగదీసి 10 సెకన్లు పట్టుకుని తర్వాత మామూలు స్థితికి తేవాలి. రోజూ రెండుపూట్లా.. ఇలా కనీసం 10 సార్లు చెయ్యాలి.
2. నేల మీద ఓ శౌకం (టవల్) పడెయ్యండి. దాన్ని కాలి వేళ్లతో పట్టుకునేందుకు ప్రయత్నిస్తూ.. కొద్దికొద్దిగా మీ వైపు లాక్కుంటూ ఉండండి. రోజూ ఇలా 10 సార్లు చెయ్యండి.

• మడమనొప్పి ఎందుకు? - ఈనాడు సుఖీభవ (10 జనవరి 2012)

కొందరు ఉదయాన్నే నిద్ర నుంచి లేచి కాలు కింద పెట్టగానే మడమ నొప్పితో విలవిల్లాడిపోతుంటారు. కొద్దిసేపు అటూఇటూ నడిచాక నొప్పి తీవ్రత కాస్త తగ్గగానే ఇక దాన్ని పట్టించుకోవటం మానేస్తుంటారు. కానీ ఈ మడమనొప్పి రావటానికి గల కారణాన్ని గుర్తించి చికిత్స తీసుకుంటే చాలావరకు దీన్నుంచి తప్పించుకోవచ్చు. ఇలాంటి మడమనొప్పి రావటానికి చాలా కారణాలే ఉన్నాయి గానీ తరచుగా కనిపించేది మాత్రం ప్లాంటర్‌ ఫేషియైటిస్‌. మన అరికాలు చర్మం కింద.. మడమ దగ్గర్నుంచి పెద్దవేలు మూలం వరకు ప్లాంటర్‌ ఫేషియా అనే కణజాలం విస్తరించి ఉంటుంది. ఏ కారణంతోనైనా చినిగినప్పుడో, సాగిపోయినప్పుడో ఇది వాచి పోతుంది. దీంతో అక్కడ మంట, నొప్పి వంటి లక్షణాలు కనిపిస్తాయి. ఇంతకీ ఇది ఎందుకు వస్తుంది? ఎక్కువసేపు నిలబడటం, అధికబరువు, అరికాలు వంపు మరీ తిన్నగా గానీ ఎత్తుగా గానీ ఉండటం, అడుగుభాగం చాలాగట్టిగా ఉండే షూ, చెప్పులు వేసుకోవటం వంటివి దీనికి దారితీస్తాయి. ప్లాంటర్‌ ఫేషియైటిస్‌తో బాధపడే చాలామందిలో మడమ వద్ద ఉండే ఎముక బయటకు పెరగటం (హీల్‌ స్పర్స్‌) కూడా ఉండొచ్చు. అయితే హీల్‌ స్పర్స్‌ మూలంగా ఫేషియైటిస్‌ రావటానికి అవకాశం లేదు.

• 
  

• 
• 
  

• లక్షణాలేంటి?

* మడమనొప్పి. ముఖ్యంగా ఉదయాన్నే నిద్ర నుంచి లేవగానే లేదంటే చాలాసేపు విశ్రాంతి తీసుకున్న తర్వాత ఎక్కువగా ఉంటుంది.
* నిలబడితే నొప్పి ఎక్కువ అవుతుండటం.
* వ్యాయామం చేసిన తర్వాత మడమ నొప్పిగా ఉండటం.

• చికిత్స

* విశ్రాంతి తీసుకోవటం
* షూ వేసుకున్నప్పుడు అరికాలు వంపునకు దన్నుగా ఉండే ప్యాడ్స్‌ ధరించటం
* మడమ నుంచి పైకి వెళ్లే కండర బంధనం, పిక్క కండరాలు సాగేలా తేలికపాటి వ్యాయామం చేయటం
* నొప్పి ఉన్నచోట మంచు గడ్డలను ఉంచటం
* ఐబూప్రొఫెన్‌ వంటి ఎన్‌ఎస్‌ఏఐడీ మందులు వేసుకోవటం.
* అధికబరువును తగ్గించుకోవటం.
* కొందరికి కార్టికోస్టిరాయిడ్‌ ఇంజెక్షన్లూ అవసరమవుతాయి.
* ఏ చికిత్సలూ పనిచేయకపోతే ఆపరేషన్‌ కూడా చేయాల్సి రావొచ్చు.

• ఇతర కారణాలు

* అన్ని మడమ నొప్పులకూ ఫేషియైటిస్‌్‌ మాత్రమే కారణం కాదు. మధుమేహం, రక్తనాళాల జబ్బు వంటి తీవ్రమైన సమస్యలూ కాలు, మడమనొప్పులకు దోహదం చేస్తాయి. కీళ్లవాతం, తీవ్రమైన దెబ్బ తగలటం, కమిలిపోవటం, గౌట్‌, ఎముకపై తరచుగా ఒత్తిడి పడటంతో స్వల్పంగా విరగటం వంటి సమస్యలూ మడమనొప్పిని కలగజేస్తాయి. కణితులు, ఇన్‌ఫెక్షన్లు కూడా కారణం కావొచ్చు గానీ చాలా అరుదు. విడవకుండా మడమనొప్పి వేధిస్తుంటే డాక్టర్‌ దగ్గరికి వెళ్లి సరైన కారణాన్ని గుర్తించి చికిత్స తీసుకోవటం మంచిది.

• ====================================

Visit my website - > Dr.Seshagirirao.com/